အီရန်အသင်း နည်းပြချုပ် ဒူစတီမာကို ပွဲကြိုသတင်းစာ ရှင်းလင်းပွဲတွင် တွေ့ရစဉ်။
အာရှ ထိပ်သီး အသင်းတစ်သင်း ဖြစ်သည့် အီရန် အသင်းအနေဖြင့် အုပ်စု(က)တွင် အာဆီယံ ဒေသမှ မြန်မာ၊ ထိုင်း၊ အနောက် အာရှမှ အသင်းငယ် ယီမင်တို့နှင့် အတူကျရောက် နေခြင်း ဖြစ်သော်လည်း ခြေစွမ်းကောင်းမွန်သည့် အသင်းများ ဖြစ်နေသောကြောင့် ခက်ခဲမည်ဟု ယုံကြည်ကြောင်း ဆိုခဲ့သည်။ “အာရှ အဆင့် ပြိုင်ပွဲမှာ ဘယ်ပြိုင်ဘက် အသင်းကမှ ညံ့မယ် မထင်ပါဘူး။ ဒီအဆင့်ကို ရောက်လာတယ် ဆိုကတည်းက သူတို့ရဲ့ အရည်အသွေးကို သက်သေပြခဲ့ ပြီးပါပြီ။ ကျွန်တော် လေ့လာထား သလောက် အရလည်း ပြိုင်ဘက် နည်းပြတွေ အကုန်လုံးက နည်းပြကောင်း တွေပါ။ လူတွေက ကျွန်တော်တို့ အုပ်စုချောင်တယ်လို့ ထင်နေကြတယ်။ အမှန်တစ်ကယ်က ကျွန်တော်တို့ အုပ်စု တစ်ကယ်ကျပ် ပါတယ်။ ကျွန်တော်တို့ အုပ်စုတွင်း တွေ့ဆုံမှုတွေ ကနေ အရမ်းကောင်းတဲ့ ပွဲတွေကို ကြည့်ရမယ်လို့ မြန်မာ ပရိသတ်တွေကို ကျွန်တော် ကတိပေး နိုင်ပါတယ်”ဟု အီရန်အသင်း နည်းပြချုပ် အလီ ဒူစတီမာ က ပြောကြား ခဲ့သည်။
အီရန် အသင်းသည် အုပ်စု အဖွင့်ပွဲ အဖြစ် ထိုင်းအသင်းနှင့် ရင်ဆိုင်ရမည် ဖြစ်ပြီး ထိုင်းအသင်းမှာ မကြာမီက ကျင်းပခဲ့သည့် အာဆီယံ ယူ-၁၉ ချန်ပီယံရှစ် ပြိုင်ပွဲတွင် တတိယဆုကို ရယူထားနိုင်သည့် အသင်းဖြစ်သည်။ အီရန် အသင်းမှာလည်း ယခု အာရှ ယူ-၁၉ ပြိုင်ပွဲအတွက် အထူးတလည် ကြိုတင် ပြင်ဆင်ထား ခဲ့သည့် အသင်းဖြစ်ပြီး ယမန်နှစ် ကတည်းက ဖွဲ့စည်းထားခဲ့ခြင်း ဖြစ်ကာ ပြိုင်ပွဲ လေးခုခန့် ကိုလည်း ၀င်ရောက် ယှဉ်ပြိုင်ထားသည်။ အီရန်သည် အာရှ ယူ-၁၉ ပြိုင်ပွဲတွင် ၁၉၈၅ ခုနှစ်က တစ်ကြိမ် ချန်ပီယံ ဖြစ်ခဲ့ဖူးပြီး ယခုပြိုင်ပွဲတွင်လည်း ချန်ပီယံ ဖြစ်နိုင်ရန် အထူးလေ့ကျင့် ပြင်ဆင်ထားသည်။ အီရန် ယူ-၁၉ အသင်းသည် စက်တင်ဘာလ အတွင်းတွင် ခြေစမ်းပွဲ တရုတ် ယူ-၁၉၊ မက္ကဆီကို ယူ-၁၉၊ မလေးရှား ယူ-၁၉၊ ကာတာ ယူ-၁၉ အသင်းများနှင့် ခြေစမ်းပွဲ ၅ ပွဲ ကစားထားပြီး မက္ကဆီကို အသင်း တစ်သင်းတည်းကိုသာ ရှုံးနိမ့်ကာ တရုတ်ကို သရေကျပြီး ကာတာနှင့် မလေးရှားတို့ကို အနိုင်ရ ထားသည်။
No comments:
Post a Comment