Disney ကာတွန်းဇာတ်ကောင် မစ်ကီနှင့် မီနီတို့အား မြို့တော်ဝန်ဦးလှမြင့် တံခါးမရှိ ဓါးမရှိ သွားလာခွင့်ပြု

ကမ္ဘာကျော် ဒစ်စနေ(Disney) ကာတွန်း ဇာတ်ကောင်များ ဖြစ်သော မစ်ကီမောက်စ် (Mickey Mouse)နှင့် မီနီမောက်စ် (Minnie Mouse) ဇာတ်ကောင် ကာတွန်းရုပ်များ အဖြစ် အရုပ်ထဲတွင် လူဝင်ထားသည့် ကာတွန်း အရုပ်များနှင့် ရန်ကုန်တိုင်း ဒေသကြီး၊ စည်ပင်သာယာရေး ၀န်ကြီး၊ ရန်ကုန်မြို့တော် စည်ပင်သာယာရေး ကော်မတီ ဥက္ကဌ မြို့တော်ဝန် ဦးလှမြင့်တို့ ယနေ့ စက်တင်ဘာ ၂၇ ရက်နေ့ နံနက် ၇ နာရီခွဲခန့်က မြို့တော်ခန်းမအနီး မဟာဗန္ဓုလပန်းခြံတွင် တွေ့ဆုံခဲ့ကြသည်။

၂၅.၉.၂၀၁၄ ရက်နေ့ကပင် ထိုင်းနိုင်ငံမှရောက်ရှိနေသော အဆိုပါ ကာတွန်းဇာတ်ကောင်များကို မြို့တော်ဝန်က ရန်ကုန်မြို့တော်အတွင်း လွတ်လပ်စွာသွားလာနိုင်သည့်အဓိပ္ပါယ်ပါ သော့တစ်ချောင်းကိုလည်း ပေးအပ်ခဲ့ရာ ယင်းအစီအစဉ်ကို ဆောင်ရွက်သည့် BEC-Tero Entertainment ၏ မန်နေးဂျင်းဒါရိုက်တာ Mr.Brian Marcar က မစ်ကီနှင့်မီနီ ကိုယ်စား လက်ခံရယူခဲ့သည်။

“Disney ကာတွန်းဇာတ်ကောင်တွေ မြန်မာနိုင်ငံကိုရောက်ရှိလာတဲ့အခိုက်အတန့်မှာ ရန်ကုန်က ဘယ်နေရာကိုပဲဖြစ်ဖြစ် တံခါးမရှိ ဓါးမရှိ ၀င်ထွက်နိုင်တယ်၊သွားလာနိုင်တယ်ဆိုတဲ့ အဓိပ္ပါယ်နဲ့ မြို့တော်ဝန်က သော့ပေးတာပါ။"ဟု ယင်းကို စီစဉ်သော Forever BEC-Tero Entertainment ၏ ပြန်ကြားရေးတာဝန်ရှိသူ ကိုနန္ဒက ပြောသည်။

လာမည့် အောက်တိုဘာ ၈ ရက်နေ့မှ ၁၂ ရက်နေ့အထိ Myanmar Event Park တွင် ပြုလုပ်မယ့် ဖျော်ဖြေပွဲတွင် မစ်ကီမောက်စ်၊ မီနီမောက်စ်၊ စင်ဒရဲလား၊ စနိုးဝှိုက်စသည့် ဇာတ်ကောင်များ ပါဝင်ဖျော်ဖြေကြမည် ဖြစ်သည်။