.jpg)
“ပုံမှန်အားဖြင့် သတ်မှတ်တဲ့ ပမာဏလည်း မကြာခင်မှာ ထုတ်ပြန်တော့မှာပါ။ သိန်းငါးထောင်လောက် ဆိုရင် သတင်းပို့ နေကြတာ။ ဒါက ဗဟို အဖွဲ့အစည်းအဝေး ခေါ်ပြီးရင် သတ်မှတ်ပါမယ်။ အရင်က သိန်း ၁ထောင် သတ်မှတ်ထားတယ်”ဟု ငွေကြေးစုံစမ်း ထောက်လှမ်းရေးဌာန ဒု တပ်ဖွဲ့မှူး ဦးကျော်ဝင်းသိန်းက ဆိုသည်။
ယင်းသို့ လုပ်ဆောင်ရန် အတွက် ပြည်တွင်းဘဏ်များနှင့် ငွေကြေးစုံစမ်း ထောက်လှမ်းရေးဌာနတို့ ပူးပေါင်းပြီး လုပ်ဆောင်လျက် ရှိသည်ဟု ၎င်းက ဆက်ပြောသည်။
သြဂုတ် ၂၁ ရက်က ရန်ကုန်မြို့ မြန်မာနိုင်ငံ ဘဏ်လုပ်ငန်းရှင်များ အသင်းရုံးတွင် ပြုလုပ်သည့် ငွေကြေးခ၀ါချမှုနှင့် အကြမ်းဖက်မှုကို ငွေကြေးထောက်ပံ့ခြင်း တိုက်ဖျက်ရေး ဆွေးနွေးပွဲ၌ ထိုသို့ ပြောဆိုခြင်း ဖြစ်သည်။
လက်ရှိတွင် ထူခြားသည့် ငွေအပ်ငွေလွှဲပြောင်းမှု အခြေအနေများကို ဘဏ်များဘက်မှ သတင်းပေးပို့သည်မှာ တလလျှင် အစောင် ရေ တထောင် ၀န်းကျင်ခန့် ရရှိသည်ဟု ဒု တပ်ဖွဲ့မှူး ဦးကျော်ဝင်းသိန်းက ပြောသည်။
“အကြမ်းဖျင်း ဆိုရင် တလကို အစောင်ရေ ၁၀၀၀ နီးပါးလောက် ရှိတယ်ပေါ့။ သတင်းပို့ရမယ့် ငွေပမာဏထက် ကျော်တဲ့ဟာပေါ့။ နောက် တပတ်မှာ ၃စောင် ၄စောင် လောက် ပါတာ။ ပိုက်ဆံတွေ အများကြီး လာထည့်တယ်။ ပြီးရင် တခါတည်း ထုတ်ပေါ့။ သံသယ ဖြစ်ဖွယ်ပေါ့။ ဒါကို ကျနော်တို့ စ စစ်ဆေးနေပြီ။ သိပ်မကြာသေးဘူး။ ပြီးခဲ့တဲ့ ၂ လလောက်ကပဲ သွားပြီး ဘဏ်တွေနဲ့ ဆက်သွယ် တယ်”ဟု ၎င်းက ဆိုသည်။
မြန်မာနိုင်ငံတွင် ယခုအချိန်အထိ ငွေကြေး ခ၀ါချသည့် အမှုပေါင်းမှာ အရေအတွက် ၇၀ ကျော်ရှိပြီး ငွေပမာဏ စုစုပေါင်း အမေရိကန် ဒေါ်လာ သန်း ၂၀၀ ကျော်ရှိသည်ဟု ငွေကြေးစုံးစမ်း ထောက်လှမ်းရေးဌာန ဒုရဲမှုး ဦးမြင့်စိုးက ပြောသည်။
“မူးယစ်ဆေးဝါးနဲ့ ဆက်နွယ်တာနဲ့ ပတ်သက်ပြီး အရေးယူတဲ့ ငွေကြေး ခ၀ါချမှုတွေ များပါတယ်။ နောက် လူကုန်ကူးပေါ့။ အချို့ဟာတွေက ရှေးဟောင်းပစ္စည်းတွေ ဘာတွေ ရောင်းတာ ပါတယ်”ဟုလည်း ၎င်းက ပြောပြသည်။
ယခုပြန်လည်ရေးဆွဲ ပြဌာန်းထားသည့် ငွေကြေးခ၀ါချမှု တိုက်ဖျက်ရေး ဥပဒေတွင် ငွေကြေး အဖွဲ့အစည်းများဘက်မှ သတင်းပို့ရမည့် အကြောင်းအရာ အပြင် သတင်း မပေးပို့ပါက အရေးယူမည့် အစီအစဉ်လည်း ပါဝင်ကြောင်း သိရသည်။
မြန်မာနိုင်ငံ၌ ၂၀၀၂ ခုနှစ်တွင် ပြဌာန်းခဲ့သည့် တရားမ၀င်သော နည်းလမ်းဖြင့် ရရှိသည့် ငွေကြေးနှင့် ပစ္စည်းများ ထိန်းချုပ်ရေး ဥပဒေကို ပြောင်းလဲ ရေးဆွဲလိုက်သည့် ငွေကြေးခ၀ါချမှု တိုက်ဖျက်ရေး ဥပဒေသစ်ကို ၂၀၁၄ ခုနှစ် မတ်လအတွင်း ပြဌာန်းခဲ့သည်။
နည်းဥပဒေမှာ လက်ရှိအချိန်တွင် ထွက်ပေါ်ခြင်း မရှိသေးသော်လည်း လာမည့် သြဂုတ်လ အတွင်း ရှေ့နေချုပ်ရုံးသို့ ရောက်ရှိပြီး ပြင် ဆင်ဖြည့်စွက် ထွက်ပေါ်လာမည်ဟုလည်း ဆိုသည်။
လက်ရှိ ပြဌာန်းထားသော ၂၀၁၄ ငွေကြေးခ၀ါချမှု တိုက်ဖျက်ရေး ဥပဒေသစ် အရေးယူမှု အပိုင်းတွင် ယခင် ဥပဒေ အဟောင်းထက် ပိုမိုထိရောက်မှုရှိကြောင်း၊ ယခင်က လူကိုသာ အရေးယူမှု လုပ်ဆောင်သော်လည်း ယခုဥပဒေမှာ လူနှင့် အဖွဲ့အစည်းကိုပါ အရေးယူ မည် ဖြစ်ကြောင်း၊ အဖွဲ့အစည်းနှင့် ကုမ္ပဏီများကို လုပ်ပိုင်ခွင့် ၅ နှစ်၊ ၁၀ နှစ်နှင့် ရာသက်ပန် ပိတ်ပင်မှုမျိုးအထိ ရှိမည် ဖြစ်ကြောင်း သိရသည်။
No comments:
Post a Comment