အိပ်မက်မက်ရာကနေ ဖြစ်တည်လာတဲ့ ချမ်းချမ်းရဲ့‘‘အိပ်မက်’’

တတိယတစ်ကိုယ်တော်ခွေ၏ အခွေအမည် အိပ်မက်သီချင်းသည် အိပ်မက်မက်ရာမှရရှိခဲ့သော သီချင်းဖြစ်ပြီး အမှတ်တရများစွာရှိကြောင်း အဆိုတော်ချမ်းချမ်းကပြောသည်။

‘‘လူတွေအများကြီးလာကြည့်တဲ့ ဖျော်ဖြေပွဲတစ်ခုကို အစ်မ အိပ်မက်မက်တယ်။ အဲဒီဖျော်ဖြေပွဲမှာ အစ်မကိုယ်တိုင် စန္ဒာရားတီးပြီး သီချင်းဆိုတယ်။ အဲဒီသီချင်းရဲ့ စာသားတွေရော၊ အလိုက်တွေရော မှတ်မိနေလို့ ရေးလိုက်တာ နာရီဝက်လောက်ပဲကြာတယ်’’ဟု ချမ်းချမ်းကပြောသည်။
ယင်းအခွေတွင် ကိုယ်ပိုင်သံစဉ်သီချင်းများ ပါဝင်မည်ဖြစ်ပြီး စုစုပေါင်း သီချင်း ၁၅ ပုဒ် ပါဝင်မည်ဖြစ်ကာ စုံတွဲအဆိုရှင်များအဖြစ် ဇော်ပိုင်၊ ဟန်ထွန်းနှင့် ဂျီလတ်တို့ ပါဝင်သီဆိုထားသည်။
ထို့အပြင် ရှေးခေတ်ဘုရားသီချင်းတစ်ပုဒ်ဖြစ်သော ဗုဒ္ဓပူဇနိယသီချင်းကိုလည်း ခေတ်ပေါ်ပုံစံတီး၍ သီဆိုထားပြီး ရဲတိုက်သရုပ်ဆောင်ကာ ပရိသတ်အားပေးမှုရရှိသည့် ‘‘ရွာ’’ဇာတ်ကားမှ သားချော့တေးသီချင်းကိုလည်း ပြန်လည်ထည့်သွင်းထားကြောင်း ချမ်းချမ်းကပြောသည်။ ယင်းအခွေကို တစ်နိုင်ငံလုံးတွင်မဖြန့်ချိမီ မန္တလေးနှင့် ပြင်ဦးလွင်တွင် စတင်ဖြန့်ချိခဲ့ရာ ပရိသတ်အားပေးမှုရရှိခဲ့ပြီး ယင်းကဲ့သို့ ဖြန့်ချိခဲ့ခြင်းသည် ယခင်ကခွေများဖြန့်ချိသည့် သမားရိုးကျပုံစံမှ ဆန်းသစ်ခြင်းဖြစ်သလို ပရိသတ်များ၏ စိတ်ဝင်စားမှုပိုမိုရရှိစေရန် လုပ်ဖြစ်ခဲ့ခြင်းဖြစ်ကြောင်း ၎င်းကဆိုသည်။