.jpg)
ငွေမည်းဖြင့် အိမ်ခြံမြေ ဝယ်ယူ၍ ဈေးကစားသည့် အဖွဲ့အစည်း သို့မဟုတ် ကုမ္ပဏီ များကို ဖော်ထုတ် တွေ့ရှိပါက ဒဏ်ကြေးငွေ ကျပ်သိန်း ၅ဝဝ နှင့် ထောင်ဒဏ် ခုနစ်နှစ်အထိ အရေးယူမည် ဖြစ်ကြောင်း ပြည်ထဲရေး ဝန်ကြီးဌာနမှ တာဝန်ရှိသူ တစ်ဦးက ပြောသည်။
ရန်ကုန်မြို့တော် အပါအဝင် မန္တလေး နှင့် နေပြည်တော် တို့၌ အိမ်ခြံမြေ ဈေးနှုန်းများ အဆမတန် မြင့်တက်နေပြီး အထူးသဖြင့် ရန်ကုန်မြို့၏ အိမ်ခြံမြေ ဈေးနှုန်းသည် ကမ္ဘာ့အဆင့်တွင် အမေရိကန်နိုင်ငံ နယူးယောက်မြို့၊ ဂျပန်နိုင်ငံ တိုကျိုမြို့များ ပြီးပါက တတိယ ဈေးနှုန်း အမြင့်ဆုံး အနေအထားတွင် ရှိနေပြီး အချို့ နေရာများမှာ စင်ကာပူ ထက် ဈေးနှုန်းမြင့်မား နေသည့် နေရာမျိုးလည်း ရှိနေကြောင်း အိမ်ခြံမြေ ဈေးကွက် လေ့လာသူ များက ပြောသည်။
မြေကွက်များ ချထား ပေးရာတွင် အိမ်ရာ ဆောက်လုပ် နေထိုင်ခြင်း သို့မဟုတ် မိမိ သဘောဆန္ဒ အရ ပြန်လည် ရောင်းချမှုများ ရှိနေခြင်းသည် တရားဝင် ပိုင်ဆိုင်ခွင့် ရရှိထား သော သူများ၏ ပုဂ္ဂလိက သဘောဆန္ဒ ဖြစ်ခြင်းကြောင့် လွတ်လပ်စွာ ရောင်းချ နိုင်ခွင့်လည်း ရှိသဖြင့် မူလ မြေကွက် ချထား ပေးစဉ်က ကန့်သတ်ချက် များအား ဖောက်ဖျက်ခြင်း မရှိပါက အရေးယူ ဆောင်ရွက်ရန် မဖြစ် နိုင်ကြောင်း သိရသည်။ သာမန်အားဖြင့် အိမ်ခြံမြေ အရောင်းအဝယ် လုပ်ကိုင် နေကြသည့် နိုင်ငံသား များနှင့် ပတ်သက်သည့် အရေးယူမှု ဆိုင်ရာ ဥပဒေပြဋ္ဌာန်း ထားခြင်း မရှိသည့် အပြင် တည်ဆဲ ဥပဒေများ တွင်လည်း နိုင်ငံသား တစ်ဦး၏ အိမ်ခြံမြေ ပိုင်ဆိုင်ခွင့် အရေအတွက် ကို ကန့်သတ် ထားခြင်း မရှိကြောင်း ဥပဒေ ပညာရှင် တစ်ဦးက ပြောသည်။
တရားမဝင် သော နည်းလမ်းဖြင့် ရရှိသော ငွေကြေးကို အသုံးပြု၍ အိမ်ခြံမြေ ဝယ်ယူခြင်း၊ အိမ်ခြံမြေ ရောင်းဝယ် ရာတွင် ပေးဆောင် ရမည့် ဝင်ငွေခွန် များကို တိမ်းရှောင်ခြင်း၊ နိုင်ငံတော်၏ ဘောဂဗလ၊ ဘဏ္ဍာရေး ဆောင်ရွက်ချက် နှင့် စီမံချက် များကို ထိခိုက်စေရန် ရည်ရွယ် ပြုလုပ်ခြင်း တို့ကို ကျူးလွန်ပါက အဆိုပါ အိမ်ခြံမြေ ရောင်းဝယ်သူ အား တည်ဆဲ ဥပဒေများဖြင့် အရေးယူ နိုင်ကြောင်း သိရသည်။ ငွေကြေး ခဝါချမှု ဥပဒေပုဒ်မ ၄၃ အရ မည်သူမဆို ငွေကြေး ခဝါချမှုကို ကျူးလွန်ကြောင်း ပြစ်မှု ထင်ရှားလျှင် ထိုသူအား ထောင်ဒဏ် ၁ဝ နှစ်အထိ ဖြစ်စေ၊ ပြစ်မှု ကျူးလွန်သူသည် ကုမ္ပဏီ သို့မဟုတ် အဖွဲ့အစည်း ဖြစ်ပါက ယင်းကုမ္ပဏီ သို့မဟုတ် အဖွဲ့အစည်းကို ငွေကျပ်သိန်း ၅ဝဝ အထိ ငွေဒဏ်ချမှတ် နိုင်ကာ အကျိုး ခံစားခွင့် ရှိသူ ပိုင်ရှင်အား ထောင်ဒဏ် ခုနစ်နှစ်အထိ ချမှတ် ရမည်ဟု ပါရှိကြောင်း သိရသည်။ (၄၄၃)
No comments:
Post a Comment