.jpg)
အမျိုးသားလွှတ်တော်ဥက္ကဋ္ဌ ဦးခင်အောင်မြင့်နဲ့ အတူ ထိုင်းနိုင်ငံကို လိုက်ပါသွားတဲ့ ကိုယ်စားလှယ်အဖွဲ့ဝင်တွေဟာ မြန်မာသံရုံးအထူးအဖွဲ့ဝင်တွေ၊ ထိုင်းရှေ့နေများကောင်စီဝင် တွေနဲ့အတူ ထိုင်းတောင်ပိုင်း စူရတ်ဌာနီခရိုင် ကော့စမွီကျွန်းကို သွားရောက်ပြီး ဆောင်ရွက်နေတာ ဖြစ်ပါတယ်။
ဒီနောက် ပူးပေါင်းအဖွဲ့ဟာ ကော့စမွီအကျဉ်းထောင်မှာ ဖမ်းဆီးခံလူငယ် ၂ ဦးကို သွားရောက် တွေ့ဆုံမယ်လို့ လိုက်ပါသွားတဲ့ မြန်မာသံရုံးအထူးအဖွဲ့ဝင် ဦးထူးချစ်က ပြောပါတယ်။
ဦးထူးချစ်က “အခုလောလောဆယ် ကျနော်တို့ တရားရုံးမှာ အာမခံကိစ္စကို စပြီးတော့ ဆွေးနွေးနေပါပြီ။ ပြီးတော့မှ ကျနော်တို့ ထောင်ကို သွားမယ်။ အာမခံကိစ္စကို ပထမဦးဆုံး သံရုံးအနေနဲ့ အာမခံပြီးတော့ ဒီကလေးတွေကို ထုတ်လို့ ရမလားဆိုတာ မေးမယ်၊ ပြီးတော့မှ မရဘူးဆိုရင် ကျနော်တို့က ငွေနဲ့ လုပ်(အာမခံ)မယ်။ အခု ကျနော်တို့က အဲဒီတရားရုံးကို ရောက်နေတယ်” လို့ နိုဝင်ဘာ ၂၆ ရက် မနက် ၁၀ နာရီမှာ ဒီဗွီဘီကို ပြောပါတယ်။
ဒီခရီးစဉ်ဟာ မြန်မာဘက်က လိပ်ကျွန်းလူသတ်မှုနဲ့ ပတ်သက်လို့ အမျိုးသားလွှတ်တော်ဥက္ကဋ္ဌ ဦးခင်အောင်မြင့် ဦးဆောင်တဲ့ ကိုယ်စားလှယ်အဖွဲ့ လာရောက်ပြီးနောက် အာမခံကိစ္စကို ဆောင်ရွက်ချက် ဖြစ်ပါတယ်။ ဒီခရီးစဉ်မှာ ဦးခင်အောင်မြင့် လိုက်ပါလာခြင်း မရှိပေမယ့် အမျိုးသားလွှတ်တော်က အကြံပေးပုဂ္ဂိုလ်တွေနဲ့ ဥပဒေပညာရှင်တွေ လိုက်ပါလာတယ်လို့ သံရုံးအထူးအဖွဲ့ဝင်တဦးက ပြောပါတယ်။
အမျုိုးသားလွှတ်တော်ဥက္ကဋ္ဌ ဦးခင်အောင်မြင့်ဟာ နိုဝင်ဘာ ၂၄ ရက်နေ့က ထိုင်းနိုင်ငံ ၀န်ကြီးချုပ်နဲ့ တွေ့ဆုံရာမှာ ဖမ်းဆီးခံ မြန်မာလူငယ် ၂ ဦးကိစ္စအတွက် စိုးရိမ်ပူပန်ကြောင်း ထပ်လောင်း ပြောဆိုခဲ့ပြီး တရားဥပဒေအရ မျှမျှတတ ကိုင်တွယ်ဖြေရှင်းဖို့ တောင်းဆိုခဲ့ပါတယ်။
ဒီမြန်မာလူငယ် ၂ ဦးက ကနဦးပိုင်းက ရဲထံမှာ ဖြောင့်ချက်ပေးခဲ့ကြပေမယ့် မိဘတွေနဲ့ တွေ့စဉ်မှာ သူတို့ရဲ့ အသက်အန္တရာယ်ကို ခြိမ်းခြောက်တဲ့အတွက် ဖြောင့်ချက်ပေးခဲ့တာ ဖြစ်တယ်လို့ ပြောဆိုပြီး တရားဝင် ဖြောင့်ချက်ကို ရုပ်သိမ်းခဲ့ကြပါတယ်။
သူတို့ ၂ ဦးကို လူသတ်မှု၊ မုဒိမ်းမှုနဲ့ ပြစ်မှုကြီး ကျူးလွန်လျက် လိမ်လည်ထွက်ဆိုမှု၊ ခိုးမှု၊ တရားမ၀င် ၀င်ရောက်မှု စတဲ့ပုဒ်မတွေနဲ့ တရားစွဲဆိုဖို့ ရဲဖက်က ပြင်ဆင်ထားပေမယ့် ဖြည့်စွက်ဖို့ အချက်အလက် လိုအပ်နေတာကြောင့် တရားရုံးကို အမှုစွဲတင်နိုင်ခြင်း မရှိသေးပါဘူး။
No comments:
Post a Comment